الرئيسية
البقاء لله وانا لله وانا اليه راجعون....
توفت الى رحمة الله تعالى الكهرباء وذلك بعد صراع مع الحكومة عفوا صراع مع المرض استمر عدة اشهر وسيتم تشييع الجنازة قريبا جدا جدا
اه..اه..اه
بيقولها كل مواطن مصرى من قلبه الاهات ديه
من الغلاء والرشاوى والفساد والدروس ...الخ الخ
وكمان جت بقى الكهرباء عشان تزود همومه هم كبير تانى...
من فترة كده يدوبك حوالى2-3 شهور والكهرباء تقريبا كل يوم بتقطع بالتناوب فى مناطق الجمهورية كلها
ومن فترة استضافوا الوزير وقال رد رخم سالوه ليه الكهرباء بتقطع رد بكل بساطة بنريح الشبكات عشان مفيش وقود يشغل المحطات
ينهار اسود بيقولك مفيش وقود ومن دلوقتى ماهو كان ممكن يلاقوا وقود لو بطلوا يصدروا الغاز لاسرائيل
وسيبك من كده كمان ده فيه مصايب جاية بس اقرأ الموضوع للاخر
طبعا احنا كلنا عارفين التقرير اللى بيقول ان مصر هينفذ منها الغاز سنة 2019 يعني بعد 9 سنين باذن الله
لما هو مش لاقى وقود دلوقتى امال بعد 9 سنين هيعمل ايه هيقطع الكهرباء بالاسبوع
وكمان الحمد لله غلوا سعر كيلو الكهرباء اظاهر عشان بتقطع
هو احنا عاوزنها تقطع وتبقى رخيصة كمان ده احنا طماعين اوى
تعالوا للاسخن بقى
النقطة اللى مفيش كائن حى فى مصر اتكلم فيها خالص_احم احم غيرى انا لو اعتبرتونى حية..!!
وهى ان نهر النيل هيقل ودول حوض النيل عاوزة تقطعه عننا وكل الكلام ده
طيب لما نهر النيل هيقل هيحصل ايه بقى الشاطر يجاوب؟؟
اول واحد هيقولى المية هتقل وسعرها هيغلى برده
هقوله صح وايه كمان؟؟فكر كده يمكن تجيبها
لو مجبتهاش انا اقولك ايه كمان
تعرف طبعا ان النيل بيولد تلات تربع الكهرباء بتاعت مصر
لما مية النيل تقل بقى!!
ايوة برافو عليكم يبقى اوتوماتيك الكهرباء بتاعته هتقل
يعنى باذن الله اضمن لك بعد 5 سنين بالكتير ستكون مصر تغرق فى عصور الظلام
الوسطى بكل معنى الكلمة
وبالمناسبة عندنا كل يوم الكهرباء بتقطع حوالي 1-2 ساعة مع انى مش ساكنة فى الجبل ولا فى الصعيد الجوانى المفروض اننا متوفر فى منطقتنا كل الخدمات
والحال ده على اغلب مناطق مصر المحروسة وكلها بالتناوب زى ما انا قولت
ونرجع للوزير تانى اللى كمل كلامه وقال ان محطات الكهرباء معدتش مستحملة الضغط اللى عليها ( يعنى مفيش كهرباء تكفى كل الناس ديه بمعنى اصح) وسالوه لو فكرتوا تعملوا محطة طاقة نووية قالهم من5-9 سنين وعليكم خير ومن كام يوم قالوا انهم هينزلوا جدول لمواعيد قطع الكهرباء شوفتوا النظام بقى؟؟
وهكذا تلفظ الكهرباء انفاسها الاخيرة لتلحق بمن سبقوها من اخوتها واخوانها ومنهم
(الديموقراطية-العدالةوالمساواة-الضمير)
واخيرا تصبحوا /تتمسوا على خير وعلى شقة فيها كهرباء وغاز وعيش كمان اهم حاجة العيش عشان الازمة بتاعت اليومين الجايين..!!
موضوع رائع شكرا
