العيد بكره .. رمضان خلص خلاص !!

السلام عليكم و رحمة الله ,


كل سنة و انتوا طيبين ,
بكره العيد إن شاء الله ,
و يا دبلة الخطوبـ....
قصدي : يا ليلة العيد آنستينا

رمضان خلص خلاص ,
و انفض السوق ,
و قد ربح فيه من ربح , و خسر فيه من خسر ,
و اللي استغل رمضان كويس و اجتهد فيه هيكون من المفلحين إن شاء الله ,
و اللي كسّل و ( أنتخ ) خسر كتير قوي ,

زي ما أمّن الرسول -صلى الله عليه و سلم- على دعاء جبريل - عليه السلام - :
(( رَغِمَ أنف امريءٍ أدرك رمضان فلم يُغفر له ))
[الراوي: أنس بن مالك - المحدث: الألباني -
المصدر: فضل الصلاة - الصفحة أو الرقم: 15
خلاصة حكم المحدث: صحيح بشواهده]

بس بصراحة الواحد ندمان حبتين ... لأ تلاته و عشر حبات كمان ,
الواحد ما كانش بيصلي كل الفروض في المسجد ,
و كان ساعات كنت بيكسل يروح يصلي التراويح ,
و يعني كان بيتفرج على التلفزيون كتير ,
و ........
بس خلاص بقى , سبق السيف العذل زي ما بيقولوا ,
ربنا يكرمنا و نعيش لرمضان اللي جاي ,
و نعوض إن شاء الله


------------------------

طبعا الكلام اللي فوق ده مش حقيقي دلوقتي ,
لأن رمضان لسه ما خلصش ,
لكنه غالبا بيبقى حقيقي في أواخر رمضان ,

تلاقي الواحد مننا في أول رمضان يقول :
أنا مش هبدأ رمضان بشدة علشان ما أزهقش بسرعة ,
لكن هبدأ بالتدريج واحدة واحدة ,
- و دي حاجة حلوة - ,
لكن تلاقي الأيام عدت ,
و دخلنا في العشرة الأواخر و احنا لسه ( بنسخّن ) ,

و نقول : هنعوضها في ليلة القدر إن شاء الله ,
و نكسّل برضه نقوم العشرة الأواخر كلهم ,
فنقوم ليلة السابع و العشرين بس ,
سواء كانت ليلة القدر أو لا ,
بس الواحد بيرضي ضميره و خلاص ,

و في الآخر رمضان بيخلص من غير ما نشتغل فيه بضمير ,
و من غير ما نستغله ,
و نقول الكلام اللي في الأول ده ,
و لا حول و لا قوة إلا بالله .

-----------------------------

و ما أبريء نفسي ,
ربنا يهدينا و يتوب علينا و يوفقنا لما يحب و يرضى ,
و يعيننا على ذكره و شكره و حسن عبادته

و كل عام أنتم بخير
و جزاكم الله خيرا

ايه لسه شويه لسه اغنية (والله لسه بدرى والله يا شهر الصيام )مجتش
يبقى لسه فى فرصة ههههه
جزاك الله خيرا